|| Om tat sat ||

Sloka Text in Telugu , Kannada, Gujarati, Devanagari, English

||ಶಿವಾಷ್ಟಕಮ್||

ಪ್ರಭುಂ ಪ್ರಾಣನಾಥಂ ವಿಭುಂ ವಿಶ್ವನಾಥಂ
ಜಗನ್ನಾಥ ನಾಥಂ ಸದಾನನ್ದ ಭಾಜಾಂ |
ಭವದ್ಭವ್ಯ ಭೂತೇಶ್ವರಂ ಭೂತನಾಥಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 1 ||

ಗಳೇ ರುಣ್ಡಮಾಲಂ ತನೌ ಸರ್ಪಜಾಲಂ
ಮಹಾಕಾಲ ಕಾಲಂ ಗಣೇಶಾದಿ ಪಾಲಂ |
ಜಟಾಜೂಟ ಗಙ್ಗೋತ್ತರಙ್ಗೈಃ ವಿಶಾಲಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 2||

ಮುದಾಮಾಕರಂ ಮಣ್ಡನಂ ಮಣ್ಡಯನ್ತಂ
ಮಹಾ ಮಣ್ಡಲಂ ಭಸ್ಮ ಭೂಷಾಧರಂ ತಮ್ |
ಅನಾದಿಂ ಹ್ಯಪಾರಂ ಮಹಾ ಮೋಹಮಾರಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 3 ||

ವಟಾಧೋ ನಿವಾಸಂ ಮಹಾಟ್ಟಾಟ್ಟಹಾಸಂ
ಮಹಾಪಾಪ ನಾಶಂ ಸದಾ ಸುಪ್ರಕಾಶಮ್ |
ಗಿರೀಶಂ ಗಣೇಶಂ ಸುರೇಶಂ ಮಹೇಶಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 4 ||

ಗಿರೀನ್ದ್ರಾತ್ಮಜಾ ಸಙ್ಗೃಹೀತಾರ್ಧದೇಹಂ
ಗಿರೌ ಸಂಸ್ಥಿತಂ ಸರ್ವದಾಪನ್ನ ಗೇಹಮ್ |
ಪರಬ್ರಹ್ಮ ಬ್ರಹ್ಮಾದಿಭಿರ್-ವನ್ದ್ಯಮಾನಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 5 ||

ಕಪಾಲಂ ತ್ರಿಶೂಲಂ ಕರಾಭ್ಯಾಂ ದಧಾನಂ
ಪದಾಮ್ಭೋಜ ನಮ್ರಾಯ ಕಾಮಂ ದದಾನಮ್ |
ಬಲೀವರ್ಧಮಾನಂ ಸುರಾಣಾಂ ಪ್ರಧಾನಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 6 ||

ಶರಚ್ಚನ್ದ್ರ ಗಾತ್ರಂ ಗಣಾನನ್ದಪಾತ್ರಂ
ತ್ರಿನೇತ್ರಂ ಪವಿತ್ರಂ ಧನೇಶಸ್ಯ ಮಿತ್ರಮ್ |
ಅಪರ್ಣಾ ಕಳತ್ರಂ ಸದಾ ಸಚ್ಚರಿತ್ರಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 7 ||

ಹರಂ ಸರ್ಪಹಾರಂ ಚಿತಾ ಭೂವಿಹಾರಂ
ಭವಂ ವೇದಸಾರಂ ಸದಾ ನಿರ್ವಿಕಾರಂ|
ಶ್ಮಶಾನೇ ವಸನ್ತಂ ಮನೋಜಂ ದಹನ್ತಂ,
ಶಿವಂ ಶಙ್ಕರಂ ಶಮ್ಭು ಮೀಶಾನಮೀಡೇ || 8 ||

ಸ್ವಯಂ ಯಃ ಪ್ರಭಾತೇ ನರಶ್ಶೂಲ ಪಾಣೇ
ಪಠೇತ್ ಸ್ತೋತ್ರರತ್ನಂ ತ್ವಿಹಪ್ರಾಪ್ಯರತ್ನಂ |
ಸುಪುತ್ರಂ ಸುಧಾನ್ಯಂ ಸುಮಿತ್ರಂ ಕಳತ್ರಂ
ವಿಚಿತ್ರೈಸ್ಸಮಾರಾಧ್ಯ ಮೋಕ್ಷಂ ಪ್ರಯಾತಿ ||

||ಇತಿ ಶಿವಾಷ್ಟಕಮ್ ಸಮಾಪ್ತಮ್||

|| Om tat sat ||